Hoërskool Riebeeckrand se nuwe groep Graad 8’s is na afloop van hul groentjiekonsert amptelik deel van die skool.
Met die tema Under the sea – ‘n bekende lied uit die treffer Disney-fliek, Little Mermaid – is vertonings 1 en 2 Februarie in die skoolsaal aangebied.
Daar was glo nie plek vir ‘n muis nie.
“Die leerders was almal visse en die konsert het die nuutheid en vreemdheid uitgebeeld wat ‘n Graad 8-leerder aan die begin van sy/ haar hoërskoollewe ervaar,” het skoolwoordvoerder Elzeri Wright gesê.
Die hoofrolle is deur die volgende Graad 8’s vertolk: Shelly (Ansuné Reynolds), Lark (Mika Harmse), Krappie (Devonique Breedt) en Justin (Jean Snyman).
Die nuwe Graad 8-leerder (of altans vissie) betree nou ‘n nuwe fase in sy of haar lewe en sien daarna uit om nuwe vriende in die hoërskool te maak. Die nuweling, Shelly, het nie net ‘n boesemvriendin ryker geword nie maar ook haar hart op Lark verloor. Soos enige liefdesverhaal loop dinge nooit seepglad nie. Lark se beste vriend, Justin maak dinge vir hom moeilik en veroorsaak dat hulle rusie maak met Shelly se vriendinne.
Maar by Hoërskool Riebeeckrand vorm almal een groot familie en word die rusie in ‘n japtrap opgelos. Die Graad 8-visse het besluit om die jaar geanker in geloof te geniet en as ‘n eenheid saam te staan.
Die leerders het die gehoor deurentyd vermaak en seker gemaak dat daar nie ’n oomblik van verveling is nie. Riebeeckrand se seniorraad bedank graag vir Tiaan Kleynhans, ‘n oud-Riebeeckrander, wat die teks vir die groentjiekonsert geskryf het.
Het jy dalk meer inligting rakende dié storie? Stuur gerus vir ons ‘n e-pos na randfonteinherald@caxton.co.za (sluit asseblief kontakbesonderhede in) of skakel ons by 011 693 3671.
Vir daaglikse gratis gemeenskapsnuus aan die Wes-Rand, besoek ook ons susterkoerante se webtuistes Roodepoort Record, Krugersdorp News en Get It Joburg West Magazine
Besoek ook ons Facebook, Twitter en Instagram blaaie om jou stem te laat tel!
