Hoërskool Jan Viljoen (Jannas) se jukskeiseisoen het in 2016 op ‘n hoë noot geëindig en daarom begin hul 2017-seisoen op net so ‘n hoë noot.
Nege van die skool se jukskeispelers het vroeg in die Desember-skoolvakansie aan die Suid-Afrikaanse (SA) Jukskeikampioenskappe in Kroonstad deelgeneem.
Op 5 Desember het die Wes-Randse dubbelswedstryde plaasgevind en elke speler het ‘n gemiddeld van 10 wedstryde gespeel.
Spelers wat medaljes verower het:
• Ruan Steyn — brons (seuns o.19A)
• Dyllan Broodryk — silwer (seuns o.19B)
• Dalèèn Nel — brons (gemeng o.16A)
Die wedstryde vir die verskillende distrikte het op 6 Desember plaasgevind en die spelers het ‘n gemiddeld van 20 wedstryde gespeel.
Spelers wat medaljes verower het:
• Ruan Steyn — 4de (seuns o.19A)
• Dyllan Broodryk — silwer (seuns o.19B)
• Dalèèn Nel — silwer (gemeng o.16A)
• Ryno Pienaar — brons (seuns o.19B2)
• Tiaan Fourie — goud (seuns o.16A)
• Talita Steyn — silwer (dogters o.16A)
Na die distriktewedstryde is Tiaan en Dalèèn gekies om die Gauteng-streek te verteenwoordig. Hier het hulle met vyf ander streke meegeding. Tiaan en Dalèèn het in hul spanverband goud verower.
Na afloop van die streekwedstryde is die SA- en SA A-span aangekondig. Die vyf beste spelers is vir die SA-span gekies en die naasbeste vyf vir die SA A-span. Tiaan en Dalèèn is albei vir die SA-span gekies.
Tiaan se span het ‘n toets teen Namibië gespeel en goud verower. Dalèèn se span het teen die SA A-span gespeel omdat Namibië nie ‘n o.16-dogterspan gehad nie. In hierdie wedstryd het hulle ook goud gekry.
Hierdie twee jukskei-ysters gaan van 27 April tot 7 Mei vanjaar aan die nasionale toer in Namibië deelneem. Tydens die toer gaan hulle Suid-Afrika in toetswedstryde teen Namibië verteenwoordig.
Lees ook
Jannas se 56 nuwe VLR-lede bekendgemaak
