NG Welsyn Randfontein is onlangs as die algehele wenner van die Tekkie Tax-fondsinsameling van 2016 in Noordwes en Gauteng aangewys.
Daar word jaarliks op Tekkie Tax-dag landswyd fondse ingesamel vir welsyns- en niewinsgewende organisasies.
Ferdi van Deventer, adviesraadslid vir bemarking en fondsinsameling by NG Welsyn Randfontein het gesê, “Ons is baie trots op hierdie toekenning. Hierdie sukses is slegs moontlik gemaak deur die ondersteuning van die plaaslike NG-gemeentes en eiendomsagentskappe.”
NG Welsyn Randfontein het ook ‘n spesiale woord van dank vir Hoërskool Jan Viljoen, Laerskool Rapportryer, Rappies Pre-Primêr, Laerskool Randfontein, Laerskool Avanté, Laerskool Westgold, Randfontein Primary asook Laerskool Venterspos.
Nasionale Tekkie Tax-dag is al drie jaar lank deel van die Suid-Afrikaanse kalender en dit word weer volgende jaar op Vrydag, 26 Mei gevier.
Die spesiale veldtog gee inwoners jaarliks die geleentheid om self te kies by watter verdienstelike saak hulle hart lê.
NG Welsyn Randfontein nooi die inwoners, vriende en familie om hulle plakkers vir volgende jaar se Nasionale Tekkie Tax-dag te koop en ‘n paar waaghalsige Tekkie Tax-veters te dra om reg te wees vir Nasionale Tekkie Tax Dag 2017.
Lees ook
NG Welsyn R’fontein bederf hulle opndersteuners
NG Welsyn R’fontein beplan glansgeleentheid
