Rower vinnig vasgetrek ná roof

‘n Man is na ‘n hoë-spoed jaagtog met EPR gearresteer kort nadat hy glo ‘n vrou by ‘n OTM in McGregorstraat naby ‘n Westonaria-inkopiesentrum van R3 000 beroof het.

Volgens Johan Krogh, Besturende Direkteur van EPR het die voorval teen ongeveer 6.26nm verlede Saterdag plaasgevind.

Krogh sê hulle het ‘n panieksein ontvang van die wagte op diens by die inkopiesentrum. Johan Steyn, ‘n EPR-reaksieoffisier is soontoe uitgestuur. Met sy aankoms is hy in kennis gestel dat ‘n vrou beroof is kort nadat sy geld by die OTM onttrek het.

Steyn het die beskrywing van die voertuig en die rigting waarin dit weggejaag het van die wagte verkry. Hy het hierdie inligting aan sy kollega, Joe Pretorius oorgedra. Pretorius was toe reeds op pad om die verdagte te agtervolg, en Steyn het elke oomblik van die jaagtog op sy tweerigtingradio gevolg.

Steyn het vinning sy voertuig dwars oor die pad in Briggstraat getrek, in ‘n poging om die rower voor te keer. Die verdagte se kar het tot stilstand gekom voor Steyn se voertuig, met Pretorius kort op die verdagte se hakke.

Die verdagte is gearresteer en is later aan die Westonaria Polisie oorhandig, nadat die geroofde geld in sy kar gekry is.