Groot talent kom in klein botteltjies

Mikayla Croukamp het weer tydens vanjaar se Raca Kunswedstryd groot opslae in die pre-primêre afdeling gemaak.

Croukamp is as die afdelingswenner in dié afdeling aangewys wat onlangs deur Randfontein High School aangebied is.

Volgens Mikayla se ma, Anita het haar dogter uitstekend gevaar.

“Mikayla is vanjaar maar drie jaar oud, en het al reeds baie goeie vaardighede op die verhoog ontwikkel,” vertel Croukamp.

Sy vertel verder dat dié dinamiese bondeltjie vreugde in vier verskillende kategorië deelgeneem het, en in elke item ‘n diamant-toekenning ontvang het.

Dié kategorië sluit Bybel prosa, Gedramatiseerde poësie en Ongedramatiseerde poësie in.

Aangesien Mikayla so goed tydens die Raca Kunswedstryd gevaar het, is sy ook tydens dié kunswedstryd se gala funksie op 27 September as die algehele afdelingswenner aangewys.

“Ons as ouers is baie trots op Mikayla en wens haar geluk met dié puik prestasies,” vertel Croukamp.