Atlete deel hul liefde vir parkrun
Met 'n groot liefde vir die parkrun maak twee RandMark atlete groot opslae.
Gerda Grundlingh en Rentia Chapman doen elke Saterdag die parkrun, al moet hulle ver ry om die 5km te voltooi.
Gerda het die parkrun vir die eerste keer in 2014 in Parys voltooi. Sy het so baie daarvan gehou dat dit ‘n passie geword het en sy het haarself uitgedaag om die afstand in ‘n vinniger tyd te voltooi.
In totaal het sy reeds 191 parkruns onder haar belt in gebiede soos Hartbeespoort, Knysna, St Francis, Amanzimtoti, Lanseria, Hermanus, Lenasia, Oos-Londen en selfs Sydney (Australië). Haar beste tyd was net minder as 28 minute in onderskeidelik Parys, Knysna en Hartbeespoort.
“Parkrun is vir almal, oud en jonk, en die samesyn is vrolik en spontaan. Dit is ook goed vir gees en liggaam. Jy hoef ook glad nie atleties te wees nie en kan jy besluit om te stap, draf of hardloop,” het Gerda gesê.
Rentia het al die parkrun by plekke soos Sterkfontein, Ruimsig, Kempton Park, Bloubergstrand en selfs Umhlanga tydens vakansie voltooi, behalwe vir natuurlik in Randfontein. Sy het al oor 30 parkruns voltooi asook as vrywilliger gewerk en foto’s geneem. Haar beste tyd is 36 minute en 48 sekondes.
“Saterdae se parkrun is regtig ‘n hoogtepunt in ons lewe,” het sy gesê.
Intussen hoop en bid parkrun-entoesiaste dat ‘n plaaslike parkrun weer aan die gang kom in Randfontein (wat ‘n eerste sal wees sedert 2019).
• Lees meer hieroor hier: Reviving a love of the parkrun in Randfontein
Gerda het bygevoeg, “Dit sal fantasties wees om weer ‘n parkrun in Randfontein te hê. Ek ry soms baie ver afstande om ‘n parkrun by te woon en ek glo daar is baie inwoners wat ‘n plaaslike parkrun sal ondersteun.”
