Ses skole pak RAM-sportvelde vir Sirkel A-atletiekbyeenkoms
Ses skole in Randfontein se atlete was in die kollig tydens 'n Sirkel A-atletiekbyeenkoms aangebied deur Laerskool Randfontein.
Laerskool Randfontein was vanjaar gasheer van die gewilde Sirkel A-atletiekbyeenkoms waar ses laerskole kragte gemeet het.
FJL Wells Primary Mine School, Malerato Primary School, Mohlakano Primary School, Laerskool Randfontein, Randfontein Primary School en Setholela Primary School was die skole betrokke met seuns- en dogtersatlete tussen die ouderdom van sewe en 13 jaar oud in aksie.
Die verskeie items waaraan leerders deelgeneem het sluit in hoogspring, hekkies, verspring, gewigstoot, 100m en 200m. Die dag het afgeskop met 200m-uitdunne vir dogters o13 en met die aflositem vir seuns o13 afgesluit.
Alhoewel die sportdag ‘n groot sukses was, het RAM se skoolwoordvoerder Annie Nolan gesê geen resultate is beskikbaar nie.
“’n Totaal van 53 atlete van Laerskool Randfontein is wel deur na die sub-distrik atletiekbyeenkoms,” het Annie vertel.
Sy het bygevoeg dat slegs die top atlete vir die byeenkoms gekies word.
Dié byeenkoms het op 15 Februarie by Laerskool Rapportryer plaasgevind en die D2-atletiekbyeenkoms sal op 20 Februarie by Hoërskool Noordheuwel plaasvind.