Talle Graad 1-leerders van Laerskool Rapportryer was vreeslik opgewonde oor hul eerste dag van grootskool.
Die leerders was netjies aangetrek en daar was nie ‘n haar uit plek nie vir die eerste amptelike dag van hul laerskoolloopbaan op Dinsdag, 11 Januarie 2022.
Rappies se 2022-groep Graad 1’s het die kans gehad om hul klasse te sien, onderwysers te ontmoet en hul maats beter te leer ken, en hulle het sommer vinnig aan die werk gespring en reeds begin inkleur met hul nuwe kryte.
Tydens die oggend het selfs die nuwe Rappies-gelukbringer vir elke klas kom groet, en die leerders kon elkeen vir die gelukbringer ‘n naam neerskryf. Die nuwe naam sal later gekies word.
Die glimlagte onder die leerders was aansteeklik en daar is nie eers een traan tydens die oggend gepink nie.
