Eerste plek vir broer, suster by Talent America

‘n Broer en suster het onlangs hul dramatalente ten toon gestel toe hulle aan Talent America deelgeneem het.

Deelnemers van tien lande het in verskeie kategorieë aan hierdie spogkompetisie deelgeneem.

Melicia, 13, en Keanan Venter, 12, het in Desember 2020 weens die Covid-19 pandemie aanlyn aan Talent America deelgeneem.

Eileen Venter, hul ma het vertel dat hulle eers nasionaal aan Talent Africa deelgeneem het en toe ook ‘n diploma by ‘n streekkompetisie verwerf het om te kon kwalifiseer om aan Talent Africa deel te neem.

Sy het vertel dat Melicia en Keanan diplomas by RACA verwerf het, en indien hulle goue- of silwermedaljes verower het, sou hulle dan kwalifiseer om aan Talent America deel te neem.

Hulle het by Talent America saam ‘n kleingroepmimiek gedoen en ‘n eerste plek daarin behaal.

Eileen het vertel dat haar kinders die afgelope sewe jaar aan RACA en vier jaar aan Talent Africa deelneem.

“Hulle neem ook deel aan NEA, Allegretto en die Youth Arts Festival. Al was daar geen sport tydens die grendeltyd nie kon hulle steeds virtueel aan dramakompetisies deelneem,” het sy gesê.

Keanan het vertel dat dit baie lekker was om aan Talent America deel te neem want hy kon homself op die rekenaar sien tydens die uitsending in Amerika.

“My droom is bewaarheid toe ek internasionaal kon deelneem want drama is my passie,” het Melicia vertel.

Volgens Eileen sou niks hiervan moontlik gewees het nie sonder die hulp van hul afrigter, Karabo Tshikube wat hulle so mooi leer en bystaan.