In die afgelope 10 jaar wat Wynand Kaltwasser in Henningstraat in Randgate woon, het hy die een munisipale probleem na die ander ervaar.
“Ons het onlangs ‘n groot probleem met die kragpaal oorkant ons huis gehad. Terwyl ons weg was oor Desember het die krag afgegaan en dit het die munisipaliteit ‘n week geneem om dit reg te maak. Ons het groot skade gely, want al ons vleis het ontvries en vrot geword. Ons wag nog vir terugvoer daaroor,” het hy gesê.
Minder as twee weke gelede was hul huishouding weer vir ‘n dag sonder elektrisiteit omdat drade aan dieselfde paal probleme gegee het. Dit is egter nie al munisipale probleem wat hulle die afgelope tyd ervaar het nie.
“Net oorkant die pad is daar ‘n oop mangat wat baie gevaarlik vir voetgangers is. Die munisipaliteit het lank terug die mangat oopgemaak om aan ‘n drein te werk, maar hulle het dit nooit toegemaak nie. Ons het dit nou met ‘n plank toegemaak, maar dis steeds ‘n gevaar.”
Hy het ook onlangs ‘n versteekte brandkraan op die hoek van sy erf ontdek.
“Ek het besluit om die sypaadjie laer te maak, want die reënwater loop in my erf in. Terwyl ek die grond uitgehaal het, het ek op ‘n versteekte brandkraan afgekom. Dit bekommer my dat die brandkraan versteek was, want hoe sou die brandweer in ‘n noodgeval daarby uitgekom het? Niemand weet hoe lank dit so was nie,” het hy gesê.
Hy is nou bekommerd dat die brandkraan se deksel gesteel gaan word. Hy het ook gesê dat dit byna onmoontlik is om enige van die probleme aan die munisipaliteit te rapporteer want hulle stuur mens óf van die een persoon na die ander óf niemand beantwoord die telefoon nie.
Volgens Wynand is DA-wyksraadslid Sina Erasmus altyd baie behulpsaam en is ‘n goeie tussenganger tussen inwoners en die munisipaliteit.
“Sy help ons altyd om die grootste probleme op te los, al neem dit die munisipaliteit so lank.”
