Milida Klaaste woon al twee jaar in haar huis in Peerstraat maar die ernstige rioolprobleem wat sy tans ervaar het eers drie maande terug kop uitgesteek.
“Die deksel van die drein in my erf het ingeval én die drein loop oor. Die rioolwater is al amper enkelhoogte en dit dam op by my hek en by my voordeur, en ek moet daardeur loop,” het sy gesê.
Lees ook:
Hoewel die munisipaliteit reeds telkemale die drein kom oopmaak het – minstens een maal per maand – was die probleem na ‘n paar dae net weer terug.
“Elke keer loop die drein vir byna ‘n week lank oor voordat die munisipaliteit opdaag – net om ’n draad in die drein te druk. ‘n Paar dae later moet ek dit weer rapporteer.”
Milida het gesê dat die probleem ’n gesondheid- en ‘n veiligheidsrisiko is.
“Die probleem beïnvloed my gesondheid, my werk en my huishouding. Die rioolwater maak my baie siek en ek was laasweek by die kliniek. Die feit dat die drein nie ‘n deksel het nie en net met ‘n plank toegemaak is, is vir my ‘n bron van groot kommer. Wanneer ek vir die munisipaliteit wag om die drein te kom oopmaak, moet ek vir hulle die hek ooplos as ek werk toe gaan en dan kom kinders in die erf in. Hulle speel in die rioolwater en ek is bang dat een van hulle by die mangat inval.”
Hoewel die rioolprobleem nie permanent opgelos word nie, ontvang Milida elke keer ‘n rekening omdat die werkers daarvoor uitgekom het. “Die munisipaliteit doen nie hul werk behoorlik nie, maar as ek nie betaal nie kry ek ‘n groen brief.”
Sy het die probleem by ’n raadslid gerapporteer met die hoop dat hy haar kan help om die probleem permanent op te los. Milida se buurman, Macdonald Pieterse, het die probleem ook gerapporteer.
“Die riool beïnvloed my huishouding ook, want riool slaan deur die vloer en dit gaan in die fondasie in,” het hy gesê.
Do you perhaps have more information pertaining to this story? Email us at randfonteinherald@caxton.co.za (please remember to include your contact details in the email) or phone us on 011 693 3671.
For free daily local news on the West Rand, also visit our sister newspaper websites
Remember to visit our Facebook, Twitter and Instagram pages to let your voice be heard!
