Meesterstuk voltooi na byna drie jaar
Na 71 tolletjies borduurgare, twee jaar en 10 maande is Elsie klaar met haar trotse borduurstuk.
![](https://images.caxton.co.za/wp-content/uploads/sites/3/2014/08/IMG_8223-Large.jpg)
Na sowat drie jaar se harde werk spog die dorp se passievolle naaldwerkster Elsie Buitendag met ‘n pragtige tafeldoek wat sy met die hand borduur het.
Volgens Buitendag is die tafeldoek sowat 2,5m lank en is al die patrone en borduurwerk met die hand gedoen.
“Ek het al van jongs af ‘n groot liefde vir naaldwerk en het reeds in Graad 4 begin om my talente as naaldwerkster te ontgin,” vertel Buitendag.
Alhoewel sy as kind geen opleiding gehad het nie, het sy in 1989 met formele opleiding begin.
Dié opleiding het vier jaar en vier maande geduur. Sedertdien, spog sy met sowat 30 geraamde borduurstukke wat alles met die hand voltooi is.
“My grootste mylpaal is my mees onlangse tafeldoek. Ek het dié stuk vir my dogter gemaak en dit het my twee jaar en 10 maande geneem,” vertel Buitendag.
Sy vertel verder dat sy 71 tolletjies borduurgare gebruik het om die projek te voltooi.
“Ek het ‘n groot passie vir naaldwerk, veral borduurwerk en ek dank God vir die talent. Sonder Hom sou ek nooit die tafeldoek of enige van my ander werke kon voltooi nie,” vertel Buitendag ten slotte.
![Elsie met die geborduurde tafeldoek wat haar sowat drie jaar geneem het om te voltooi.](https://images.caxton.co.za/wp-content/uploads/sites/3/2014/08/IMG_8225-Medium.jpg)