Twee van Hoërskool Riebeeckrand se top dansers, Leila Swanepoel en Bianca Jansen van Vuuren moet beslis dopgehou word in die toekoms.
Volgens die bemarker van Hoërskool Riebeeckrand, Rickus Kruger is beide dié leerlinge studente by Mario Gomes Hip Hop Dans Akademie.
“Dans is ‘n groot passie vir albei dogters en hul resultate wys dat hul harde werk in die dansateljee beloon word,” vertel Kruger.
Hy verduidelik dat vanjaar tot dusver ‘n groot jaar vir dié dansers was.
Beide Leila en Bianca vorm deel van Mario se dansgroep, LXD en het vroeër vanjaar aan die Battle of the Giants danskompetisie deelgeneem wat by Sun City aangebied is. Dié dansgroep het ‘n algehele tweede plek verower en het sodoende gekwalifiseer om aan die Suid-Afrikaanse Danskampioenskappe deel te neem.
“Die kampioenskappe het gedurende Junie in die Kaap plaasgevind waar LXD ‘n gouemedalje losgedans het,” vertel Kruger.
Hy sê dat Leila en Bianca op 21 Julie as deel van LXD aan die Gauteng Kampioenskappe deelgeneem het en weereens met die eerste plek weggestap het.
“Met al die puik prestasies, het Leila en Bianca ook vir die Wêreld Kampioenskappe gekwalifiseer,” vertel Kruger.
“Dié kampioenskappe sal later vanjaar in Duitsland plaasvind. Baie geluk met julle puik prestasies en sterkte met julle voorbereiding vir julle volgende groot kompetisie.”
