Teine oorheers Germiston Simmer by House of Pain

Dit was ‘n goeie dag op die rugbyveld vir Randfontein Rugbyklub toe al hul spanne aan die wenkant was.

Dit was die derde rondte van die klubkampioenskap wat weer in Teine se agterplaas plaasgevind het wat ook bekend staan as die House of Pain. Hierdie keer het die manne teen Germiston Simmer op Saterdag, 11 Maart kragte gemeet.

Lees ook: New club rugby tournament launched

Ten spyte van die oorheersing, het klubbestuurder Lulu Kleyn gesê Germiston het ‘n goeie geveg voortgesit.

Lees ook: Teine ends year with touch rugby tournament

“Hulle [Germiston] was goeie teenstanders. Ons is wel baie trots op ons manne wat op die dag baie goed gevaar het.”

Wat die tweedespan aanbetref het Teine vir Simmer met ‘n uitstekende telling van 71-7 kafgedraf. Rynhard Kruger het drie drieë vir sy span gedruk terwyl Christo van Emmenis, Corne Hulme, Christofer Rossouw, Pieter Janse van Rensburg, Alvin Folscher, Calvin Kannemeyer en Eugene Ferreira met een elk kon spog.

Die eerstespan het ook gemaklik met 67-26 geseëvier. Teine het altesaam 11 drieë gedruk met hul ster-vleuel Itu Mpete wat vier keer agter die opponent se doellyn gaan boer het. Ander driedrukkers was Ruan Pieterse (met twee), Johannes Meintjies, Rudi Marx, Johan Swart, Wessel van Staden en Rynhard Kruger (elk een).

Teine se o21s is vergoed na hul loesing teen Wanderers einde Februarie deur dié einste opponent die keer te klop met ‘n wegholsege van 37-0. Hier het Henry Payne twee drieë gedruk met Michael Veldman, Xander Smith, Collin Da Corte en Ryan Strydom wat elk met een drie bygedra het.

Teine se volgende kragmeting is weg van die huis af teen aardsvyand Khosa in Krugersdorp op 18 Maart.

“Die gemeenskap is welkom om ons manne te kom ondersteun,” het Lulu afgesluit.