Gimnas maak sy terugkeer na 10 jaar

Renier Koen keer na tien jaar terug na die sport waarvoor hy die liefste is – gimnastiek.

Renier, 29, het op sewejarige ouderdom met gimnastiek en tuimel begin. In sy skoolloopbaan was hy verskeie maal in die kollig vir sy wêreldklas prestasies. Hy het vir meer as 12 jaar sy passie daagliks by die Impala Gimnastiekklub in Krugersdorp uitgeleef.

Die grootste prestasies in sy loopbaan was toe hy by die Suid-Afrikaanse Kampioenskappe vyf maal as wenner in sy ouderdomgroep vir tuimel aangewys is. Hy het ook tydens dieselfde kampioenskappe vier maal die wennerstrofee in gimnastiek huis toe geneem.

In 2007 het Renier vir die Quebec Kanada Wêreldkampioenskappe vir tuimel geoefen toe hy ‘n baie ernstige voetbesering opgedoen het. “Ek het alles in my voet geskeur en moes my droom prysgee,” het Renier gesê.

Na tien jaar het hy besluit om sy vrees te oorkom en weer gimnastiek te begin beoefen omdat hy glo dat veral tuimel in sy bloed is. Hy glo dat as mens eenmaal ‘n gimnas was, jy altyd een sal wees.

Vir tuimel, wat ook vloergimnastiek genoem word, word geen rekwisiete of toerusting gebruik nie. Die gimnas doen verskeie spronge, handstande, wawiele en bollemakiesies oor die hele oppervlakte van die mat. Balans, ritme en harmonie is uiters belangrik.

Renier het vertel dat hy beoog om vir die Tuimel-wêreldkampioenskappe wat in 2019 plaasvind, te kwalifiseer. Hy wil graag oud en jonk inspireer om nooit hul drome prys te gee nie.

Het jy dalk meer inligting rakende dié storie? Stuur gerus vir ons ‘n e-pos na randfonteinherald@caxton.co.za (onthou asseblief om jou kontak besonderhede by te voeg) of skakel ons by 011 693 3671.

Vir daaglikse gratis gemeenskapsnuus aan die Wes-Rand, besoek ook ons susterkoerante se webtuistes 

Roodepoort Record

Krugersdorp News

Get It Joburg West Magazine

Besoek ook ons Facebook, Twitter en Instagram blaaie om jou stem te laat tel!