![](https://images.caxton.co.za/wp-content/uploads/sites/117/2023/06/Untitled-1-6-780x470.jpg)
Die Potchefstromer, dr. Adele Broodryk, het vandag (Sondag, 11 Junie) by die 2023 Comrades Marathon ‘n briljante tweede plek behaal in ‘n uitstekende tyd van 5:56:26. Sy het sodoende verbeter op haar derde algehele plek in die 2022 Comrades Marathon.
![](https://images.caxton.co.za/wp-content/uploads/sites/117/2023/06/Adele-B-459x400.jpg)
Broodryk se tyd van 5:56:26 is die derde vinnigste in geskiedenis en plaas haar voor legendes en voormalige wenners soos Maria Bak en Elena Nurgalieva.
Hierdie Nedbank-atleet is ‘n senior lektor in menslike bewegingskunde aan die Noordwes-Universiteit (NWU).
Die rekords het behoorlik platgeval in die 2023 Comrades Marathon vanaf Pietermaritzburg na Durban (87.7km) met die wenner, Gerda Steyn, wat ‘n 34-jaar oue rekord in die vroue af-wedloop verbeter het. Steyn het in 5:44:54 met ‘n groot glimlag op haar gesig klaargemaak. Die vorige rekordhouer was die Comrades-legende Frith van der Merwe wat sedert 1989 die rekord van 5:54:43 behou het.
![](https://images.caxton.co.za/wp-content/uploads/sites/117/2023/06/353596470_648518637397363_8820888707130255714_n-520x347.jpg)
Die Nedbank-atleet, Tete Dijana, het ook sy Comrades titel suksesvol verdedig en ook ‘n nuwe rekord vir mans opgestel met ‘n tyd van 5:14:01. Hy het die vorige rekord wat David Gatebe in 2016 opgestel het met 4 minute verbeter.