Die NWU Centre for Health and Human Performance (CHHP) bied vanjaar ‘n fantastiese geleentheid vir ses top hoërskool-atlete en fietsryers in Potchefstroom.
Armand Willemse, Phemelo Molale, Sandri van Rooyen, Ryno Schutte, Ernie Roets en Rico Leijenaar is die atlete wat vanjaar deel van hierdie opwindende CHHP-program is. Die program is amptelik op 15 Maart by Cyclo DNA bekendgestel.
Elkeen van hierdie ses atlete ding mee teen die beste in die land op SA-vlak en behaal gereeld top plekke in hulle onderskeie sportkodes.
“Ons het na die plaaslike talent op skolevlak gekyk en op ‘n kortlys van 12 atlete afgekom. Binne ons begroting het ons toe besluit om ses atlete (drie fietsryers en drie atlete) te kies. Ons wil hulle die geleentheid gee om te sien wat dit behels om ‘n professionele sportatleet te wees en ook terselfdertyd ‘n diens te lewer om hulle vordering oor die volgende paar jaar te monitor,” noem die CHHP direkteur, prof. Pieter Kruger.
Foto’s: Wouter Pienaar
Kruger is bekend as ’n kliniese sielkundige wat spesialiseer in Elite sport/korporatiewe en prestasie sielkunde. Dr. Bertus le Roux (besigheids en operasionele bestuurder van die NWU CHHP) sal die program oorkoepelend bestuur. Dr. Yolandi Willemse (hoof van NWU CHHP: Biokinetika en Sportwetenskap), Jana Storm (bestuurder van CHHP Sportwetenskap), Cor Leijenaar (bestuurder van CHHP Biokinetika), prof. Ankebé Kruger (sportwetenskaplike en sielkundige) en prof. Lize Havemann-Nell (sport-dieetkundige) sal deel van die span vorm wat die atlete gedurende die jaar sal bystaan.
“Ons wil sien dat ons die atlete na die volgende vlak kan neem. Ons wil graag daardie platform vir hulle skep dat hulle dieselfde kwaliteit diens as Olimpiese atlete kry om te kan sien hoe sport op ‘n hoë vlak bedryf word. Ons is regtig opgewonde hieroor. Ons wil graag iets aan ons eie gemeenskap teruggee,” sê Kruger.
