Drieë reën by Interprovinsiale Sewestoernooi in Potch

Op die eerste dag in vanjaar se Inter Provinsiale Sewestoernooi wat by die Fanie du Toit Sportgronde dié naweek (28-29 September) plaasvind, het die groot kanonne met mening gewys waartoe hulle in staat is.

14 van die land se top unies, sowel as ‘n gekombineerde SA LSOB-span neem in vanjaar se toernooi deel met die Westelike Provinsie, Vrystaat en die Goue Leeus wat sover hul stempel met mening afdruk.

Die WP het in poel A met 31-5 vir die Blou Bulle afgereken, terwyl die Leeus in ‘n puik poel-D wedstryd net-net vir Griekwas met 27-24 geklop danksy Jaydian Petrus se drie na die sirene.

Foto’s: Wouter Pienaar

Die tuisunie, die Luiperds, het wel hulle toernooi met twee nederlae geopen toe hulle teen twee topunies, die Goue Leeus (43-7) en die Vrystaat (38-12) die onderspit gedelf het.

Vir die Luiperds het Ruben Oosthuizen, Giovanni Pestana en Mosa Mthanjana drielynkoors gehad en die punte vir die Luiperds in hierdie twee kragmetings aangeteken. Die Luiperds speel vanmiddag om 16:00 teen die Griffons in hulle laaste poelwedstryd.

Môre vind die uitspeelwedstryde plaas met die OP wat teen SWD uitdraf om 09:30.

Lees meer in komende week se Potchefstroom Herald oor hierdie toernooi.