Gimmies se veelsydige speler, Divan Mienie, het weer ‘n skitterwedstryd vir die eerstespan hierdie naweek teen Hoërskool Pietersburg in die Finsbury B-liga gehad. Gimmies het op Saterdag 11 Februarie teen Pietersburg gespeel en met 116 lopies gewen. Gimmies teken 252/6 in hul toegelate 50 beurte aan.
Duan Jansen is Gimmies se sterkolwer en teken ’n pragtige 103 onoorwonne lopies aan terwyl Divan Mienie 59 lopies bygedra het. Pietersburg word in die 41ste beurt vir 136 lopies uitgeboul, Divan Mienie neem 4/27 in sy 10 boulbeurte. Gimmies speel hul laaste poelwedstryd eerskomende Saterdag (18 Februarie ) in Kemptonpark teen die Kempies, terwyl die o.15’s tuis speel teen Kemptonpark.
Die o.15’s het intussen na Pietersburg gereis en met 3 paaltjies teen Pietersburg gewen. Die wenlopies is van die laaste bal af aangeteken. Junior Mathe teken 53 onoorwonne lopies aan, Dirco Bester 46 en Stefan Schoeman 41. Louis Fourie, Dirco Bester en Dylan Niemack het elk 2 paaltjies geneem.