Daar is ‘n goue trotsheid wat in die lug hang by Amelia Nasorgsentrum in Potchefstroom. Medaljekoors het hier oorgeneem met 13 medaljes wat tussen vier ongelooflike atlete verdeel is na hulle deelname aan die 2016 Trisome Spele in Firenze, Italië.
Saam met hulle staan hulle trotse afrigter en mentor, Hans Kleyn, wat jare se harde werk en opoffering agter die blad het. Hierdie atlete en hulle afrigter deel ‘n hegte band en hierdie samesyn het nou tot drie nuwe wêreldrekords en ses goue medaljes, vier brons en drie silwer, gelei.
Dit was ‘n wêreldklas vertoning in eie reg met 35 ander lande wat ook aan die spele deelgeneem het.
“Dit was ‘n ongelooflike ervaring gewees. Ek is trots op almal van hulle. Ons het gewys tot wat ons in staat is en die vorige wêreldrekords ver verbeter,” vertel Kleyn trots.
Melanie Barnard het vier goue medaljes in die gewigstoot, spiesgooi, werpskyf en 4×400 meter aflos behaal. Sy het ook nuwe wêreldrekords in die gewigstoot en diskus opgestel.
Cornell Reyneke het brons in die gewigstoot en spiesgooi behaal, terwyl die jong Juliet Mailula ‘n goud in die 4×400 meter aflos behaal het. Die ervare Hannes Walt de Klerk het ook oudergewoonte weer sy staal gewys en veral in die 800 meter stap sy goue voetspore met ‘n nuwe wêreldrekord gelos.
“Hierdie keer het ek met 32 sekondes verbeter,” voeg hy met ‘n groot glimlag by. Asof dit nie genoeg was nie, het hy ook silwermedaljes in die 100 meter, 1500 meter stap en spiesgooi behaal, sowel as brons in die 200 meter en gewigstoot items.
Jansie Els en Jaco Jordaan het ook deelgeneem, maar nie medaljes verower nie.
Verdere artikels oor Amelia se atlete:
https://www.citizen.co.za/potchefstroom-herald/18161/amelia-se-atlete-is-reg-vir-italie/
