Nuutgeverfde padtekens op die hoek van Rocherstraat en die N12, maak motoriste deurmekaar.
Met die oorverf van die padtekens, is die tekens verander en dus is mense onseker hoe hulle moet ry. Dit veroorsaak dat verkeer nie in die oggende oor die N12 kan kom nie.
Potchefstroom First responders het mense op hulle Facebook-blad gewaarsku om na die nuwe padtekens op te let.
“Neem asseblief kennis dat die padtekens by die verkeersligte by N12 / MC Roode/ Rocherstraat verander het en oorgeverf is. Gereelde padgebruikers wat hierdie kruising gebruik, moet asseblief aandag gee aan die nuwe padmerke.”
Anné van Onselen, DA-raadslid, sê daar is ‘n rede vir die verandering.
“Dankie vir almal wat oplettend is en my gekontak het. Vele Bailliepark-inwoners het Saterdag terwyl die tegniese span nog besig was om te verf, gekla oor die nuwe padtekens. Alhoewel dit definitief beter verkeersvloei verseker as die linkerbaan links én reguit kan gaan en die regterbaan slegs regs draai, is ek meegedeel dat die pad nie in lyn is met die oorkant by MC Roode, om die linkerbaan te laat reguit oorry nie. Dit was ‘n storie om die span gereël te kry om te gaan verf, maar ek sal probeer om dit verander te kry. Ek besef die risiko daaraan soos dit tans geverf is.”