Die toneelstuk “Ken jy vir Dewie?” het vandag afgeskop in die Weet-en-Sweet saal op die NWU kampus en het die teatergemeenskap betower met sy indringende en ontstellende vertelling van die innerlike wêreld van ‘n stil en teruggetrokke jong seun. Hierdie “immersive” teaterproduksie, geskryf deur Ilne Fourie en geregisseer deur Margit Meyer-Rödenbeck, bied ‘n unieke ervaring aan die toeskouers, wat as ‘n soort woordelose klasmaats ingeskakel word in Dewie se worsteling met depressie, angs en die gevolge van jare lange boelie.
Die produksie begin met ‘n 15 minute lange voorstuk buite die teater, waar juffrou Jennie, vertolk deur Crystal Donna Roberts, die Graad 10 leerders in die eksamen lokaal roep. “Kom Graad 10 leerders, julle moet reg in julle rye staan sodat julle kan in stap in die eksamen lokaal,” moedig sy aan. Hierdie opwarmingsdeel stel onmiddellik ‘n realistiese atmosfeer en laat die toeskouers voel asof hulle deel van die storie is. Die karakter van Dewie, vertolk deur Robert Hindley, is ‘n stil figuur wat die skare se aandag trek deur sy introspeksie en angs.
Die produksie ontbloot die uitdagings wat Dewie in sy alledaagse lewe in die gesig staar, en bied ‘n diepte-blik op sy psige. “Ek glo in my stilte, dit is my heilige tyd,” het Dewie in ‘n ontroerende monoloog gesê. Hierdie woorde weerklink met ‘n hartseer wat die gehoor uitdaag om die realiteit van angs en depressie in die jeug te verstaan.
Dewie se interaksies met sy klasmaats, veral met die ekstrovert Kyle, vertolk deur Joshwin Dyson, skep ‘n interessante dinamiek. Kyle se kuberkrakery en sy arrogante houding kontrasteer skerp met Dewie se terughoudendheid. Dewie probeer voortdurend om sy onderwyseres, juffrou Jennie, in te lig oor sy innerlike stryd, maar sy pogings word dikwels in die wind geslaan. Hierdie interaksies bring die ontstellende werklikheid van boelie na vore: “Hulle weet, maar niemand sê iets nie,” het een toeskouer opgemerk na die vertoning.
Die gebruik van epiese teaterelemente in die produksie is ook noemenswaardig. Dewie se innerlike gedagtes en sy afkeer van Kyle se gedrag word deur direkte aanspreekings aan die gehoor beklemtoon. Hierdie tegniek breek die vierde muur en maak die toeskouers bewus van hul eie rolle in die verhaal. Dit dwing hulle om na te dink oor hoe hulle reaksies en interaksies met ander invloed kan hê op iemand se welstand.
Teen die einde van die produksie neem die storie ‘n skokkende wending wanneer Dewie, in ‘n bui van wanhoop, ‘n vuurwapen gebruik. Hy skiet juffrou Jennie raak en worstel om homself dood te skiet, asook om Kyle te benadeel. Hierdie intense klimaks bied ‘n kragtige kommentaar op die desperate situasie waarin Dewie hom bevind, en die vraag wat dit laat ontstaan: “Wat dryf ‘n doodgewone jong seun tot sulke onmenslike dade?”
Die produksie word moontlik gemaak deur Momentum Beleggings Aardklop, die KKNK en die Suidoosterfees, en het ‘n groot indruk op die gehoor gemaak. Met ‘n talentvolle rolverdeling wat die kompleksiteit van die karakters tot lewe bring, is “Ken jy vir Dewie?” meer as net ‘n teaterproduksie; dit is ‘n roepstem vir verandering en ‘n uitnodiging tot die gesprek oor boelie, geestelike gesondheid en die belangrikheid van luister.
Kyk ook die video onderhoud wat gevoer is deur Jade Sateria van Potchefstroom Herald om die diepte van die karakters en storielyn te verstaan. Hierdie gesprek bied verdere insig in die ontwikkeling van die karakters en die kritieke temas wat die produksie ondersoek.
KYK:
