Slaggate in Potchefstroom: ‘n Noodroep om aksie!
Oor dekades van verwaarlosing en verontagsaamheid wag die mense tevergeefs vir 'n oplossing vir die vernielde paaie wat hul lewens en bates bedreig. Die nalatigheid van die JB Marks Munisipaliteit is skreiend sigbaar in die vertrapte infrastruktuur wat die gemeenskap pla.
Die slaggate in Potchefstroom, veral in die Uitbreiding 9, het ‘n nagmerrie vir inwoners geword. Oor dekades heen het die mense van hierdie pragtige stad tevergeefs gewag op ‘n oplossing vir die vernielde paaie wat hul lewens en bates bedreig. Dit is ‘n verhaal van verwaarlosing en verontagsaamheid, waarin die JB Marks Munisipaliteit se nalatigheid duidelik na vore tree.
Raadslid Johan Zerwick het die ernstige toestand van die paaie in JB Marks beklemtoon. Hy het dit treffend beskryf as ‘n situasie waarin bande en voertuie daagliks beskadig word, en waar selfs polisie- en noodvoertuie weier om in die gebied te ry. “Dit is ‘n onaanvaarbare situasie wat die veiligheid van die inwoners in gevaar stel en hul toegang tot noodhulp bemoeilik. Selfs taxi’s, wat ‘n belangrike rol speel in die vervoer van kinders en gemeenskapslede, het geweier om die gebied te betree as gevolg van die ontoeganklike paaie,” het Zerwick gesê.
Leon Meyer, ‘n bekende inwoner van Potchefstroom, het sy frustrasie uitgespreek oor die gebrek aan aksie van die plaaslike regering. Hy het gesê dat karre letterlik ineenstort as gevolg van die padtoestande, en dat politieke partye soos die VF-Plus en DA, wat hul teenwoordigheid in die gebied getoon het, nie daarin geslaag het om die veiligheid van die inwoners te waarborg nie. “Dit is ‘n skreiende versuim aan die kant van die munisipaliteit om die basiese infrastruktuur te handhaaf en die belange van sy mense te beskerm,” het Meyer gesê.
Die JB Marks Munisipaliteit het egter niks te sê gehad oor die aanklagtes van padprobleme en slaggate nie. Hierdie stilswye spreek boekdele oor hul onverskilligheid teenoor die lyding en ongemak van die gemeenskap. Dit is ‘n duidelike erkenning van hul nalatigheid en versuim om verantwoordelikheid te neem vir die verbetering van infrastruktuur, en bevordering van die algemene welstand van inwoners.
“Die tyd vir verskonings is verby. Die inwoners van Potchefstroom verdien beter. Dit is tyd vir die JB Marks Munisipaliteit om sy muis te wys en dringende stappe te neem om die padprobleme aan te spreek en ‘n veilige en toeganklike omgewing vir almal te verseker,” het Meyer gesê. Raadslid Zerwick vertolk laastens sy hart op die volgende direkte aanhaling; “Die toekoms van Potchefstroom hang af van die optrede van sy plaaslike regering. Laat ons hoop dat hulle die uitdaging aanvaar en die verandering bring wat so dringend nodig is.”
