‘n Potchefstromer het onlangs ‘n lelike ontmoeting met ‘n slaggat in Smitstraat gehad wat haar duisende uit die sak gejaag het. Sy het sodoende besluit om ‘n eis teen die J.B. Marks munisipaliteit in te stel.
Lizelle Taljaard het in Smitstraat met haar Volkswagen Polo gery en nie opgemerk dat die pad effens insak waar die slaggat is nie. Weens die slag is drie van haar wieldoppe gekraak, ‘n band beskadig en die linkerkantste voorwiel se laer beheerarm van een van haar wiele moes ook vervang word.
Hierdie episode met die slaggat het vir Taljaard-hulle ongeveer R 8000 uit die sak gejaag.
“Ek is hoogs die duiwel in. Dit is ‘n slaggat wat mens nie eers sien nie. Ons sit ‘n eis in teen die munisipaliteit sodat hulle die kostes kan terugbetaal. Ons moes ‘n laer beheerarm koop en laat regmaak deur ‘n vriend van ons, wat ons darem goedkoper uitgewerk het,” vertel Taljaard.
“Dit is ‘n baie lelike gat. Mense moet versigtig wees en eise insit sodat die munisipaliteit weet dat ons dit nie gaan duld nie,” meen sy.
Die J.B. Marks munisipaliteit het teen druktyd nog nie op navrae gereageer nie.
