‘n Rower het Vrydag, 14 Junie ‘n man met ‘n mes gesteek, nadat hy sy selfoon gesteel en probeer vlug het.
Volgens kapt. Mvula Chaka, polisiewoordvoerder, het die slagoffer Vrydagaand omstreeks 22:45 saam met ‘n vriend in Walter Sisululaan gery waarna hulle ‘n bakleiery tussen drie ander mans gesien het.
Hulle het stilgehou en nader gegaan om te kyk wat aangaan. Die mans het ophou baklei, die slagoffer aan sy broekgordel geruk en met ‘n mes gedreig. Hulle het sy selfone gevat en weggehardloop maar die slagoffer en sy vriend het hulle agterna gesit.
Hulle het daarin geslaag om een van die rowers vas te trek maar in die proses is die slagoffer met ‘n mes gesteek.
Die rower is egter in hegtenis geneem en een van die gesteelde selfone is in sy besit gekry.
