Nege huiskomiteelede van Caput manskoshuis wat onlangs tydelik van hulle posisies geskors is, is weer op hulle pos.
Dit volg nadat die Noordwes-Universiteit (NWU) ’n ondersoek van stapel gestuur het na ’n beweerde ontgroenings-voorval.
Rapport het berig dat die voorval op 12 Januarie in die koshuis se ontspanningsaal plaasgevind het. Volgens Rapport het een van die HK lede glo die verwarmers in die saal aangeskakel terwyl die eerstejaars daar moes wag. Dit is onduidelik hoe lank die groep in die saal moes wag. Slegs die Primarius van die koshuis is nie geskors nie.
Volgens Louis Jacobs, direkteur van korporatiewe kommunikasie, is die ondersoek nou voltooi en die skorsing van die lede sal amptelik vanaf Donderdag opgehef word.
Die skorsing word opgehef op voorwaarde dat al nege HK-lede ’n program voltooi wat op korrektiewe maatreëls fokus,” het hy gesê.
By verdere navrae het Jacobs benadruk dat die universiteit enige menseregte kwessies in ’n baie ernstige lig sien en dat enige ontgroeningspraktyk nie geduld sal word nie.
