Meer as 40 verdagtes is oor ’n periode van ’n week in verband met dwelms deur die polisie vasgetrek.
Volgens kapt. Mvula Chaka, polisiewoordvoerder, is die meeste mense op die Bult en in die sakekern van die stad vasgetrek.
Behalwe dagga, is daar veral ook CAT en tik in mense se besit gevind.
“Dwelmverwante misdaad hou baie verband met ander misdade. Mense steel, roof en moor om geld te kry om dwelms te koop.
“Ons kan baie ander misdade aanspreek deur dwelmverwante misdaad te probeer uitroei,” het hy gesê.
Dwelms is al ’n geruime tyd ’n probleem in die stad en die Herald het in 2014 ’n reeks artikels gedoen wat op die erns van die kwessie gefokus het.
Volgens Chaka is die polisie besig om hulle beste te doen om misdaad te voorkom.
“Ons het ’n beleid van geen verdraagsaamheid wanneer dit by misdaad kom,” het Chaka gesê.
Volgens hom sluit die arrestasies ook mense wat aangekla word vir bestuur onder die invloed van dwelms en drank, asook die onwettige verkoop van alkohol in.
“Ons is reeds besig met feestyd operasies,” het Chaka gesê
Die waarnemende stasiebevelvoerder, kol. Marilette Myburgh, het die beamptes geprys en bedank vir die goeie werk wat hulle gedoen het.
