’n Hoogs ontstelde Potchefstromer se identiteit is glo “gesteel” en gebruik om ’n selfoonkontrak by MTN uit te neem.
Hannes Gerber sê hy het besef daar is groot fout toe MTN in Februarie R36 000 van sy rekening afgetrek het.
“Dit was veral vreemd omdat ek nog nooit ’n kliënt van hulle was nie,” het hy aan die Herald gesê.
Gerber moes toe eers met die bank baklei om die geld terug te kry, waarna hy na MTN toe is om die saak met hulle op te klaar. Volgens hom het hy toe ’n prosedure gevolg deur ’n beëdigde verklaring af te lê om te bewys dat hy die regmatige houer van sy ID is.
“Daarna het hulle my belowe dat dit nou afgehandel is,” sê hy.
In Maart is daar egter weer R37 000 van sy rekening afgetrek en moes Gerber weer deur dieselfde prosedure gaan.
“Nou bel skuldinvorderaars my om die geld wat ek kwansuis aan MTN skuld in te vorder,” vertel hy.
Volgens die bestuurder van MTN in Mooirivier Mall, Marlinet Moller, is die winkels in Mooirivier Mall en Riverwalk albei franchises van MTN en bekend as Cellnetwork.
Hulle kan sulke probleme net aan MTN rapporteer waarna hulle afhanklik is van terugvoer van MTN. Moller sê hulle het Gerber se probleem aan MTN deurgegee.
Daar is toe vasgestel dat identiteitsdiefstal plaasgevind het.
Die bedrog-afdeling het dit verder ondersoek.
Volgens haar het hulle die regsafdeling in kennis gestel nadat Gerber weer by die winkel was om te kla. Bewyse hiervan is aan die kliënt gegee en hy is in kennis gestel dat die probleem nou in MTN hoofkantoor se hande is,” het Moller gesê.
Bridget Bhengu, senior kommunikasiebestuurder van MTN, het bevestig dat Gerber ’n slagoffer van identiteitsdiefstal was.
Sy het bevestig dat eksterne skuldinvorderaars gebruik word en dat Gerber se naam en besonderhede van hulle skuldlyste afgehaal sal word.
“Die saak is vriendskaplik opgelos met mnr. Gerber,” het Bhengu gesê.
Gerber sê hy is gelukkig dat hy geen finansiële verlies gelei het nie.
Hy het intussen ook ’n saak van bedrog by die polisie aanhangig gemaak.
