Twee ongelukke wat Maandagoggend tussen 07:30 en 09:00 plaasgevind het, het die lewens van twee mense geëis.
Die eerste ongeluk het op die Carletonvillepad (R501) plaasgevind nadat ’n motor en ’n bakkie trompop gebots het.
Volgens ER24 het die bakkie op sy dak gelê en dit was duidelik dat die motor verskeie kere gerol het. ’n Vrou wat reeds aan haar beserings beswyk het, is naby die motor gevind.
Die vrou het waarskynlik uit die motor geval toe dit gerol het. Ses ander pasiënte is deur paramedici op die toneel gevind.
Een van die pasiënte, ’n man, het kritieke beserings opgedoen.
Die pad was tydelik gesluit sodat die ER24 helikopter die pasiënt kon oplaai.
Die ander ongeluk het op die N12 op pad na Klerksdorp, sowat 15km van Potchefstroom, gebeur.
ER24 het op die toneel ’n bakkie, wat sement vervoer het, op sy dak gevind. Drie mans is beseer, waarvan een se toestand kritiek was. ER24 het die man behandel, maar na 20 minute het hy aan sy beserings beswyk.
Die twee ander mans is na Potchefstroom-hospitaal geneem. Die presiese oorsaak van dié twee ongelukke is nog onbekend, maar die polisie was op die toneel om ondersoek in te stel.
