Die Dorsland JOOLplaas het die afgelope naweek behoorlik gegons toe sowat 11 000 mense bymekaar gekom het om weer eens na ’n fantastiese musiekprogram te luister.
JOOL 2017. Foto: Marianke Saayman
Donderdagaand het bekende musikante soos Karen Zoid, Francois van Coke, Die Heuwels Fantasties, Desmond and the Tutus en Fokofpolisiekar opgetree, en Vrydagaand het Joshua Na Die Reën, Spoegwolf, aKing en die internasionaal bekende Parlotones weer die gehoor geskud.
Wynand Myburgh. Foto: Marianke Saayman
Die plaaslike sangsensasie, Majo Rademeyer en Taking Autumn, was ook by JOOL te sien.
Die hoogtepunt van Vrydagaand was die jaarlikse vuurwerkvertoning met ’n sensasie van kleure.
Volgens die studenteraadslid vir JOOL, Marno Rossouw, was daar vanjaar beslis meer mense wat JOOL bygewoon het. Hy skryf dit daaraan toe dat die helfte van hulle van ver af gekom het om die naweek in Potchefstroom te kom geniet.
Karen Zoid. Foto: Marianke Saayman
Sowat 11 000 mense het JOOL Donderdagaand en 9 000 Vrydagaand bygewoon. Daar is sowat 47 000 eenhede drank oor die twee aande verkoop.
Die Heuwels Fantasties. Foto: Marianke Saayman
Volgens Rossouw was JOOL weer ’n groot sukses. Die geld wat tydens JOOL ingesamel word, word aangewend vir verskillende SJGD (Studente JOOL Gemeenskapsdiens) projekte.
Besoek gerus www.potchefstroomherald.co.za om al die foto’s van JOOL te sien.
