Promosa bekommerd oor opgehoopte vullis en oorlopende puttoilette
Die munisipaliteit het nie op navraag reageer nie.
Opgehoopte vullis en puttoilette wat oorloop, is ‘n gesondheidsgevaar vir die mense van Promosa.
Inwoners van Hillside View in Promosa sukkel al vir meer as sewe maande met vullis wat nie verwyder word nie en puttoilette wat nie leeggemaak word nie.
Martin Boosen, ‘n leier in die gemeenskap, sê die munisipaliteit word amper daagliks gekontak oor die probleem.
“Dit gaan al vir sewe maande so aan. Die mense begin nou al self hulle oorlopende puttoilette skoonmaak. Die afval word dan by die begrafplaas gestort. Dit beteken dat met die hitte wat op pad is, gaan die reuke ondraagbaar wees. Dit gaan ook verskriklik baie vlieë lok,” het hy gesê.
Volgens Martin word die vullis ook nie verwyder nie en hoop dit op agter die huise van talle inwoners.
“Dit word nou ‘n stortingsterrein agter ons huise. Almal in die gemeenskap is bitter ongelukkig. Ons kan nie so in vullis lewe nie,” het hy verduidelik.
Navraag is by die munisipaliteit gedoen, maar teen tyde van publikasie is geen terugvoer ontvang nie.
