Man van sy beursie en selfoon vroegoggend beroof

‘n Man is vanoggend (Dinsdag, 20 Junie) omstreeks 05:00 vermoedelik van sy beursie en selfoon in Miederpark beroof. Die man was glo op pad werk toe, toe hy deur twee mans oorval was.

Een man het hom na bewering met ‘n ysterpyp teen die kop geslaan terwyl die ander man hom met ‘n skroewedraaier in sy hand gesteek het.

Hy was glo self na die hospitaal toe waar hy behandeling ontvang het.

Volgens sy werkgewer het hy nie ernstige beserings opgedoen nie en is weer terug by sy huis.

Die Herald het navraag by die polisie oor die voorval gedoen en daar is bevestig dat daar nog geen saak aangemeld is nie.