Twee rowers, ʼn man en ʼn vrou, het Saterdag (25 Mei) ʼn vrou met ʼn vuurwapen gedreig waarna hulle haar van haar selfoon beroof het.
Volgens ao. Mpho Manyoba, polisiewoordvoerder, het die vrou omstreeks 12:30 die middag in Chief Albert Luthulistraat gestap toe ʼn man en vrou haar genader het.
“Hulle het haar gevra of hulle iemand met haar selfoon kan bel,” vertel Manyoba.
Sy het vir hulle gesê sy het nie lugtyd op haar selfoon nie en die paar het toe weggestap. Die vrou het verder op haar eie gestap toe daar skielik ʼn motor voor haar van die pad aftrek. Dieselfde paar wat haar vroeër vir haar selfoon gevra het, het uit die motor geklim en na haar toe gekom.
“Sy het weer vir hulle gesê sy het nie lugtyd nie maar toe klap die vrou haar skielik,” sê Manyoba.
Die man het toe ʼn vuurwapen uitgeruk en dit teen haar maag gedruk. Sy het haar selfoon vir hulle gegee waarna hulle weer in die motor, ʼn swart Volkswagen Polo, weggery het.
Die polisie ondersoek ʼn saak van roof met ʼn vuurwapen. Nog niemand is in hegtenis geneem nie.
