Voel jy nie jou ou-self nie? Jy sukkel met min dryfkrag en lyk die toekoms vir jou donker? Dalk voel dinge wat jy in die verlede maklik kon hanteer, nou vir jou soos ‘n berg, en voel jy soos ‘n mislukking? Hierdie gevoelens gaan nie weg nie en dit is nie vir jou moontlik om jouself ‘reg te ruk’ nie. Dalk voel jy dat jy in ‘n diep, donker gat is waaruit geen ontsnapping moontlik is nie? Die kans is goed dat jy moontlik depressief is.
Na raming raak depressie meer as 300 miljoen mense wêreldwyd en daar word vermoed dat dit selfs soveel as 350 miljoen kan wees. Vrouens is meer geneig tot depressie, maar meer mans sterf as gevolg van selfdood.
Volgens ‘n bron probeer ongeveer 460 mense in Suid- Afrika daagliks om hul eie lewe te neem. Hiervan is 23 suksesvol – dit beteken ‘n verlies van 8 000 lewens ‘n jaar. Wat nog meer kommerwekkend is, is dat tienerselfdood aan die toeneem is. Ongeveer 9% van alle tienersterftes is as gevolg van selfdood. In die 15-24 jaar ouderdomsgroep is selfdood die tweede grootste oorsaak van dood.
Daar is al verslae van kinders so jonk as 6 jaar wat gesterf het as gevolg van selfdood. Dit word algemeen aanvaar dat meer mense met depressie en angssimptome sukkel ná die aanvang van Covid-19. Depressie affekteer ‘n persoon se gesin, werkslewe, slaap-en eetpatrone en algemene gesondheid. Dit is ook kommerwekkend dat ten spyte daarvan dat depressie in die meeste gevalle redelik maklik en suksesvol behandel kan word, meer as die helfte van mense wat wêreldwyd deur depressie geraak word, geen behandeling ontvang nie.
Hoe lyk depressie?
Aangesien daar nie ‘n mediese toets is om te bepaal of iemand depressief is of nie, is dit nodig om na simptome te kyk.
Vyf van die volgende agt simptome moet teenwoordig wees om ‘n diagnose van ‘major depressie’ te kan maak. Hierdie simptome moet minstens vir 14 dae aanmekaar teenwoordig wees, en verskil van die “normale” rouproses wat volg ná die verlies van ‘n geliefde.
* ‘n Bedrukte gemoed meeste van die tyd, amper elke dag
* Verminderde belangstellings en /of ervaring van plesier in alle of amper alle aktiwiteite, meeste van die tyd, amper elke dag
* Verandering in eetlus en gewig. Gewigsverlies sonder dat ‘n dieet gevolg word of gewigstoename, met ander woorde ‘n afname of toename in eetlus.
* Psigomotoriese traagheid of aggitasie * Moegheid en lusteloosheid – verlies aan dryfkrag
* Gevoelens van waardeloosheid, selfverwyt en skuldgevoelens
* Gebrekkige konsentrasie, vergeetagtigheid en besluiteloosheid.
* Herhaalde gedagtes aan die dood en selfdoodgedagtes. Depressie is een van die hoofredes van selfdood, maar is ‘n siekte wat behandel kan word.
Om ‘n diagnose van depressie te bevestig, en vir verdere behandeling is dit belangrik om ‘n dokter, psigiater of kliniese sielkundige te besoek. Depressie kan behandel word met medikasie (anti-depressante) en terapie. Leefstyl aanpassings soos oefening, gesonde eetpatrone en streshantering kan ook waarde hê. Die selfdood van ‘n jongman het opnuut die behoefte by baie ouers en familie beklemtoon aan kanale waar vir hulp aangeklop kan word
Indien jy of iemand naby aan jou depressief is en selfdoodgedagtes het, is hierdie belangike kontaknommers.
SADAG Suicide Helpline 0800 567567
Cipla Mental Health Helpline 0800 456 780
SMS – 31393
WhatsApp (9:00-16:00) 076 882 2775
Buurtwaggroepe in Parys soos We Care het ook kontak met beraders wat jou dadelik in kontak met ‘n berader kan bring. * Trudie sal volgende week inligting gee oor die mees algemene gemoedsversteurings – depressiewe versteurings, bipolêre steurings en ander gemoedsversteurings.
