Die Vaderlandswilg oftewel Combretum Erythrophyllum, is ’n baie gepaste boom vir Parys, want hy kom natuurlik voor in die noorde van die Vaalrivier, ’n groot gedeelte van KwaZulu-Natal en in die Noord-Kaap, langs die Oranjerivier-stelsel. Hierdie boom is inheems, semi-bladwisselend en sy blare verkleur in die wintermaande na ‘n diep rooi. Hy lok ook bye en voëls met sy aromatiese blomme in die lente.
En ja, die “wilger” in sy naam verwys na sy takke wat afgroei soos ’n rivierwilger, maar dié boom is nie so ‘n watervraat soos die rivierwilger nie. Inteendeel – die
Vaderlandswilg is baie gehard in droogtes.
Dit kan hitte en koue ewe goed hanteer, en groei in enige grond. Boonop is hy ’n vinnige groeier en om dié rede ’n baie populêre gedenktuin boom. As jy ’n boom soek om vir jou kinders ’n boomhuis te bou, of as maklike klim-en-klouter boom, kan jy beslis die Vaderlandswilg oorweeg. Hierdie pragtige boom het nie ’n aggressiewe wortelstelsel nie, en kan dus met groot sukses naby plaveisel, opritte, swembaddens en mure geplant word.
Ekstrak van die boom se blare en bas is al baie suksesvol gebruik vroeër jare en steeds vir hul anti-bakteriese, anti-inflamatoriese asook anti oksidante aktiwiteite.
Die gewildste gebruik is om ’n tee te maak van stukkies bas wat dan gedrink word of direk aangesmeer word op wonde. Hierdie boom kan tot 7m hoog groei. ’n Besliste aanwins vir enige tuin.