Gemeenskap se wakker oë is motordiewe se Moses
Twee motordiewe het hul rieme verlede week behoorlik styfgeloop nadat hulle die afleweringsvoertuig van Almur Smit Pluimveeplaas in Tumahole gesteel het.
![](https://images.caxton.co.za/wp-content/uploads/sites/116/2017/12/burglar-key-blog.jpeg)
Die twee werknemers van dié onderneming was besig om eiers af te laai met een van die werknemers wat nog agter in die voertuig was, en die ander een in die winkel. Die motordiewe het die werknemer agter in die voertuig toegemaak en met die voertuig weggejaag. In die ry kon die werknemer met ’n afstandbeheerder daarin slaag om die klap van die laairuimte oop te maak en uit die voertuig te rol. Hy is net lig beseer.
Intussen het familie van die werknemers by wie se huise daar verbygery is, opgemerk dat dit vreemde gesigte in die voertuig is. Hulle het alarm gemaak en die voertuig agterna gesit. Die afgeslane klap het die beweging van die voertuig belemmer en kort voor lank is die motordiewe naby die dorp se vullisstortingsterrein deur die gemeenskap vasgetrek en die voertuig teruggevind.