Jerky kom huis toe
Na maande se toegewyde sorg was Jerky uiteindelik gereed om weer in die natuur vrygelaat te word
Vier maande nadat personeel van die Parys Dierebeskermingsvereniging (DBV) tot die redding gekom het van ‘n erg beseerde likkewaan, is Jerky (soos hy intussen gedoop is) na behandeling by die Johannesburg Wildlife Vet, Dinsdag deur die DBV vrygelaat by ‘n privaat wildreservaat net buite Parys.
Jerky se pad saam met die DBV het op 13 Mei vanjaar begin toe hy swak en gedehidreer gekry is nadat ‘n hond hom gebyt het. Hy is oornag by Parys Dierehospitaal gestabiliseer en toe na Johannesburg Wildlife Vet geneem. Tot personeel se verbasing het X-strale gewys dat hy drie keer geskiet is met ‘n .22 en ‘n windbuks – wat verduidelik het waarom hy so swak was.
Na maande se toegewyde sorg was Jerky uiteindelik gereed om weer in die natuur vrygelaat te word, en het Parys DBV hom Dinsdag gaan haal en vrygelaat by sy nuwe tuiste.
