Ster-atleet help ander om die pas vol te hou

Met geoefende treë gee hy die pas aan. Die atleet se oë op hom, want sy taak is om seker te maak atlete wat hul vertroue in hom stel, behaal hul teikendoelwitte in ‘n wedloop.

Maklik is dit nie, en nie enigeen slaag daarin om die pas aan te gee nie. Jare se oefening en ervaring as professionele middelafstand atleet het Henco Uys egter geleer om gefokus te wees.

“Jy moet weet hoe dit voel as jy ‘n sekere pas hardloop,” gesels hy met sy teruggekeer van Europa waar hy vir drie weke in België, Duitsland, Pole, Luxemburg, Switzerland en Holland pasaangeër was vir verskeie atlete.

Pasaangeërs haal die druk van die atleet af, en help om die atleet se wedloopplan uit te voer om op bepaalde tye by sekere afstande te wees, verduidelik hy.

“Jy werk konstant met doelwitte.” Sodra die pasaangeër die atleet by sy doelwitafstand op tyd gekry het, gaan hy af van die baan, en is die atleet op sy eie om die wedloop te voltooi.

Henco het die afgelope drie jaar vir homself naam gemaak as professionale pasaangeër nie net in Europa nie, maar ook in Suid-Afrika.

Bekendes soos Jerry Motsau (SA kampioen in die 1500m), Djamel Dejati (die wêreld se nr.1 in die 800m), en Edmund du Plessis (SA kampioen in die 800m) het onder meer al sy pas gevolg.

Van sy hoogtepunte was die vinnigste 600m wat in Afrika gehardloop is met Henco wat die pas aangegee het vir Slimane Moula (die wêreld se nr.7 in die 600m). Henco het die 400m merk in 46.9 gehaal.
Hy het ook die atleet Mohamed Ali Gouaned in Pole gehelp om met ‘n tyd van 1:44.4 te kwalifiseer vir die Olimpiese Spele.

So ook die Australiese rekordhouer, Steward Mcsweyn wat sy beste tyd vir die seisoen in die 1500m behaal het, en so sy plek by die Olimpiese Spele verseker het.

Die wedloop wat Henco saam met Djamel Sedjati as pasaangeër gehardloop het, was die vinnigste tyd in Afrika in die 1000m met ‘n tyd van 2:13.97.

Henco het op skool begin uitblink as kranige sportman in onder meer atletiek, rugby, tweekamp en landloop. Toe hy provinsiale kleure in al dié sportsoorte verwerf, het hy die keuse gemaak om op atletiek te fokus.

Vroeg in sy hoërskooljare is sy atletiekdrome verpletter toe hy met Scheuermann se siekte, gediagnoseer is.
Terwyl hy nie aan atletiek kon deelneem nie, het Henco die tyd gebruik om as jong seun sy eie lekkergoed onderneming, The Candyman, in Parys te begin.

Hy gaan studeer Menslike Bewegingskunde en sielkunde, en doen later sy honneurs in sportwetenskap asook besigheidsbestuur en administrasie.

Op 21 het Henco in so mate herstel dat hy weer kompeterend kon begin deelneem aan atletiek.
Hy was verskeie kere in die SA-span ingesluit. Sewe SA medaljes en verskeie wedlope in die buiteland het gevolg in die 13 jaar wat hy daarna professioneel gehardloop het.

Een van sy uitstaande prestasies- ‘n skitterende vierde plek in die World Student Games in Taipei. Hy was ook in 2018 gekies vir die Statebondspele in Australië maar het twee weke voor sy deelname sy enkel gebreek.

Terwyl hy op ‘n keer in Duitsland deelgeneem het, het die Duitse Federasie se atlete wat vir ‘n wedloop moes kwalifiseer, ‘n pasaangeër gesoek en is hy raakgesien. So het dit gekom dat hy tussendeur wedlope as professionele pasaangeër begin werk het.

Na sy pa, Nico, se dood het Henco hom minder op kompeterende deelname toegespits en meer dikwels die pas aangegee. “Ek doen steeds waarvoor ek lief is, maar op hierdie manier help ek atlete om hul drome na te jaag,” sê hy.

Hy kyk selde op sy horlosie wanneer hy die pas aangee, want jare se oefening het hom geleer om sy pas te hou en aan te pas.

Henco werk meestal privaat maar ook deur ‘n agentskap wat pasaangeërs werf vir atlete.

Sy vrou, Lente, ‘n apteker van beroep, is self ook ‘n professionele 400m atleet en pasaangeër, wat verlede week aan die Southern Region African Championships deelgeneem het.

Wanneer Henco nie op die atletiekbaan is nie, kry jy hy hom in sy lekkergoedwinkel wat mense van oral oor besoek vir die verskeidenheid soetigheid wat jy hier raakloop en sal onthou uit jou kinderdae, of by sy onderneming Prolab Recovery waar hy jong atlete help met herstel en rehabilitering na beserings.
Iemand wat die pas aangee ook as dit by sakevernuf en deursettingsvermoë kom.

Sy oog gefokus op die doelwitte wat hy najaag, met vele wat reeds bereik is.