Vrou se liggaam van krans af gehaal na urelange reddingsoperasie
Die vrou het 40m ver na haar dood geval toe sy oënskynlik te voet onderweg was na die Lesotho-grens.
Die liggaam van ‘n 30-jarige vrou is Vrydagnag na ‘n uerlange reddingsoperasie by Fouriesburg naby aan die Lesotho-grens van ‘n krans afgehaal nadat sy 40m ver geval het.
Agt lede van die Dihlabeng Nood Mediese span, speurders van Behlehem, en lede van die Bethlehemse buurtwag het gehelp met die gevaarlike reddingsoperasie, het Mondli Mvambi, woordvoerder van die Vrystaatse Departement van Gesondheid gesê. ‘n Hommeltuig is deur die Bethlehemse Buurtwag gebruik om vas te stel waar die liggaam is om die reddingspan se taak te vergemaklik.
Voorlopige aanduidings is dat sy vermoedelik te voet van Fouriesburg na die Lesotho-grens gevlug het, toe sy geval het.
Die dapper optrede van vrywilligers, nooddienspersoneel en die polisie het verseker dat die oorledene met waardigheid begrawe kan word deur haar familie, het Mvambi gesê.
Die Vrystaatse LUR vir gesondheid, Monyatso Mahlatsi het die onbaatsugtige toewyding van die reddingspan geloof.
Daar is ook bevestig dat die polisie besig is met die ondersoek na die tragiese voorval.
