Vernielsug het net nie einde nie.
Selfs die parkrun-roete is nie gespaar van die hande van vandale nie
Die omdraaipunt van die Egweni River Lodge parkrun moes onlangs skuif nadat ‘n gedeelte van die rivierwal ingetuimel het. Gevolglik is twee pale met ‘n geverfde plank wat die nuwe draaipunt op die roete aandui, ‘n ent voor die plek waar die wal ingetuimel het, geplaas.
‘n Paal met ‘n pyl is ook voor ‘n smal sementbruggie langs die roete geplant sodat parkrunners weet dat die roete hier skei vir dié parkrunners wat in die rigting van Egweni beweeg, en dié wat van Egweni af kom.
Die afgeloe drie weke het eers die paal met die pyl voete gekry, en kort daarna is ook die geverfde plank wat die draaipunt aangedui het van die pale afgebreek.
Parkrun-vrywilliger Johan van Niekerk se tuinier wat gehelp het om beide die tekens op die roete te plant, het kort nadat dit opgesit is, die paal en pyl in die
dorp opgemerk en dit aan Johan gaan rapporteer. Die skuldige is gekonfronteer en die paal met die pyl teruggekry, maar die eens netjiese draaipunt-merker is steeds gebreek.
“Mens wil graag die roete netjies hê,” sê Johan, want parkrunners kom van oraloor om die pragtige roete langs die rivieroewer
te kom geniet.
Daar is selfs nou ‘n Belgiër wat tans in SuidAfrika is, wat Saterdae hier aan die parkrun deelneem. Vraag is hoe stop jy die vernielsug van vandale?
