Edwin bestuur weer na motorongeluk

Die inspirerende verhaal van die oud-Gimmie, Edwin Nelson, het nog ‘n belangrike hoofstuk bereik toe hy verlede maand vir die eerste keer na sy motorongeluk weer self bestuur het.

Ongeveer drie maande na hy albei sy voete onder die knie in ‘n gru-motorongeluk op die R53 vanaf Potch na Vaalpark verloor het, sterk Edwin so goed aan dat hy weer agter die stuurwiel kon inklim.

Op die “Rise with Edwin” Facebookblad is daar ‘n video gedeel waar Edwin agter die stuur van ‘n wit Toyota sportnutsvoertuig inklim en weer op die grondpad met sy prostese leer bestuur.

“Ek leer nog, bestuur is nog moeilik op die oomblik. Ek moet net oefen om weer daardie gevoel terug te kry. Dit is nog ‘n stap vorentoe,” vertel Edwin.