Dit gebeur al meer dat mense gevang word met allerlei slim slenters om hulle van hul swaarverdiende spaargeld te beroof. Jy moet maar weet – as iets té goed klink om waar te wees – dan is dit!

En as jy eers gevra word om geld oor te betaal in ‘n rekening voordat jy jou prysgeld kan kry – dan moes jy al die rooi ligte sien flikker het.

Nog ‘n slenter wat gebruik word is dat daar kwansuis ’n transaksie op jou bankrekening deur is wat nie gemagtig was nie, en dat jy net gou die 3 klein nommertjies agter op jou bankkaart moes lees sodat die transaksie omgekeer kan word of ‘n sogenaamde unieke kode moet gee wat na jou selfoon gestuur is.

Die slinkse bedrieëers het reeds al jou inligting – dikwels selfs by watter bank jy ’n rekening het, of probleme wat jy met jou rekening onlangs gehad het. Maar moenie glo nie – gaan maar eerder na jou naaste tak en gaan maak self seker of die storie waar is. Selfs die polisie se naam word gebruik deur die swendelaars wat jou vra om geld oor te betaal om byvoorbeeld ‘n gesteelde voertuig wat gekry is, aan jou terug te besorg. Die polisie sal jou onder geen omstandighede bel met so ‘n versoek nie.

Selfs staatsdepartemente en private instansies se name word deesdae gebruik om valse vakatures te adverteer, en sodra jy al jou inligting verskaf het, of geld oorbetaal het, is dit ook die laaste sien van jou geld en die beloofde pos. Moenie ingaan op webtuistes wat jy nie ken of kan vertrou nie. Wees versigtig en waaksaam wanneer jy sosiale media gebruik.

Wees eerder oorversigtig as om blindeling aanlyn aankope op allerhande web- en Facebook blaaie te doen, of vriendskappe te smee met mense wat jy van geen kant af ken nie. Jy moet weet swendelaars verdwyn net so vinnig as wat hulle op jou selfoonskerm verskyn.

As jy dan weer die nommer sou skakel of die webtuiste wil besoek, is hulle skoonveld. As jy bejaarde vriende of ouers het, waarsku hulle asseblief want dit is juis bejaardes wat dikwels die teiken van hierdie gewetenlose bedrieërs is.

Bankkaartdiefstal vind ook steeds plaas en moet jy onder geen omstandighede toelaat dat iemand jou by ’n kitsbank help nie. Jy kan amper seker wees dat daar met ’n kitsbank gepeuter is as jou kaart nie in die kaartgleuf wil in nie, of vassteek. Moet ook nie dan na ‘n ander kitsbank in die omgewing gaan nie, want dikwels word meer as een kitsbank in ‘n omgewing gesaboteer.

Moenie saans of laatmiddag gaan wanneer dit verlate by die kitsbank is nie, en moet nooit nooit nooit jou pinnommer of kaart vir iemand anders gee nie. Met huisbrake en diefstalle wat ook kommerwekkend hoog is in die dorp, moet jy seker maak jy laat niks waardevol in jou erf of jou huis oop en bloot rondlê nie. Dit is beslis ’n uitnodiging vir diewe.