Enorme skade aan laboratoriumtoerusting en rekenaars in die toetslaboratorium by Parys se watersuiweringswerke, is Satermiddag 24 Junie, net na 16:00 aangerig nadat vlamme van ‘n veldbrand teenaan die waterwerke na die laboratoriumgebou versprei het.
Die raadsaal in die gebou het afgebrand het mnr. Phele, Ngwathe se waarnemende tegniese direkteur gesê, maar dit is die enorme brand- en waterskade in die laboratorium wat groot kommer wek.
Die laboratoriumtoerusting in die gebou is deur De Beers Voorspoed Myn aan die Ngwathe munisipaliteit geskenk, en is die R2,2 miljoen se splinternuwe toerusting en gerenoveerde toetslaboratorium in September 2021 aan die munisipaliteit oorhandig. Daar is toe gesê dat die laboratorium ‘n belangrike bydrae sou lewer om te verseker dat veilige en skoon water aan die gemeenskap van Parys gelewer kan word.
Nou is die geld wat vir die labotorium geskenk was, letterlik in die water.
Die brand kon vinnig onder beheer gebring word danksy die vinnige optrede van LGV, Working on Fire, Ngwathe Brandweer- en Nooddiens en Parys Medix. Raadslede Marinda Matthysen-Engelbrecht en Selma Kok was ook op die toneel om hulp te verleen
Dit was reeds die tweede brand by ‘n gebou op die waterwerke-perseel die afgelope paar maande.
Veral in wintertyd is dit kritiek belangrik dat gras rondom geboue veral by sleutelpunte soos die waterwerke kort gehou word.
