Kan jy dit glo! Vanmiddag, Woensdag 9 November, net na 15:00, helder oordag, is die sowat 40m lange gesteelde Telkom kabel in Delverstraat af gesleep tot by Grewarlaan.
Was dit nie vir ‘n lid van die publiek wat dit raakgesien het en Security Master geskakel het wat onmiddellik op die oproep gereageer het nie, was die kabel weg.
En toe die man die sekuriteitspersoneel gewaar wat op sy spoor is, het hy die kabel en sy gereedskap neergegooi en laat spaander tussen die riete in waar hy sy klere uitgepluk en vermoedelik in die rivier gespring het. Sekuriteitspersoneel het self ook tussen die eilande na hom gesoek, maar hy was in ‘n oogwink skoonveld.
Die kabel, die man se klere en gereedskap wat vermoedelik gebruik is om die kabel te sny, is aan die polisie oorhandig.
Kabeldiefstal kos munisipaliteite ‘n aardige bedrag en sorg vir lang ure sonder krag tot inwoners se groot frustrasie.
Asseblief wees bedag hierop. As jy enige verdagte beweging of persoon sou sien aan kragkabels of substasies peuter, iewers sien grou onder verdagte omstandighede, of ooggetuie sou wees van waar kabel weggedra word soos vanmiddag, skakel onmiddellik die polisie of jou sekuriteitsmaatskappy.
Die publiek se oë en ore is nodig om hierdie misdaad die hok te slaan.