‘n Tweede damwal het nie by die Jagersfontein-myn gebreek nie.
Die strome water wat Dinsdagaand gesien is, was as gevolg van ‘n dam wat oorgeloop het ná reën die afgelope tyd in die Jagersfontein-gebied geval het. Die dam is agter die slikdam waarvan die wal op 11 September gebreek het.
Daar is ook reeds vanoggend (Woensdag 28 September) begin om dreineringspype wat verstop was op die mynterrein, oop te maak, en is rampbestuurspanne steeds daar om die skoonmaak ná die vroeëre ramp te monitor. Twee mense word ook steeds vermis.
Toe die dam Dinsdagaand begin oorloop het, en water oor die R706 gestroom en met die slik wat reeds daar lê gemeng het, het mense paniekerig begin raak uit vrees dat dit ‘n herhaling kon wees van die ramp wat vroeër hier gesien is.
Na meer as twee weke is grondverskuiwingstoerusting steeds besig om skoon te maak ná die slikvloed van 11 September wat huise platgevee en verwoesting gesaai het veral in Charlesville. Die slikmodder is baie dig en versmoor plant- en waterlewe.