Alle ouers (pleeg-, aanneem of biologiese ouers) wat die behoefte het om ʼn hegter verhouding met hul kinders te hê en graag beter met hulle te bind, kan aansluit by ʼn ondersteuningswerkgroep wat hul belangrike vaardighede sal leer.

Susan Fouché bied dié werkgroep oor altesaam agt Saterdagoggende in Augustus en September aan.  Sy is ʼn ervare pleegouer en derde jaar maatskaplike werk student aan die NWU. Susan en haar man is die afgelope 15 jaar self pleegouers van twee nie-verwante pleegkinders en het saam twee kinders wat onderskeidelik 20 en 13 jaar oud is.

Die groepwerksessies is gratis en vind van 9:00 – 11:00 by Hoffmanstraat 127 plaas. Datums wat vooraf geboek moet word, is 6, 13, 20 en 27 Augustus en 3, 10, 17 en 24 September. Daar word onder meer gefokus op die top 10 faktore wat jy in ag moet neem om met jou kind te bind (of herverbind) en sluit ook praktiese vaardighede, terapie en groepsgesprekke in, wat jou met die nodige vaardighede sal toerus. Hierdie is die ideale geleentheid vir ouers wat meer “uitdagende” kinders het. Die werksessies poog om die chaos te kalmeer, jou stres te verlaag en weer vrede in die huis te bring wat jou beter sal laat slaap, weer laat lag en jou kind te geniet.

Ouers kan vir die werksessies registreer deur  ʼn WhatsApp met hul naam, van en telefoonnommer asook die ouderdom van hul kind aan 082 048 6309 te stuur. ʼn E-pos kan ook gestuur word na webmaster@vessels.org.za. Inskrywings sluit hierdie Vrydag, 5 Augustus om 13:00.