Nog vier vermeende koperdiewe is die afgelope week in Koppies in hegtenis geneem.
Transnet koperkabel ter waarde van R74 000 is in die minibus gekry wat deur die verdagtes gebruik is, en is in Heuningspruit gesteel.
Lede van ’n private sekuriteitsmaatskappy was besig met patrollie toe hulle die verdagte Quantum-minibus opgemerk het. Toe hulle die voertuig nader, het die verdagtes weggejaag.
Die polisie se hulp is gevra, en toe die verdagtes die polisievoertuig sien, het hulle stilgehou en te voet gevlug.
Knst. Victor Khabane het daarin geslaag om die bestuurder van die voertuig te arresteer. Sy drie makkers is deur lede van die polisie, die sekuriteitsbeamptes en lede van die publiek agterna gesit en ook gearresteer.
