Polisieduikers het vanoggend, Donderdag 24 Maart net voor 01:00 die liggaam van die derde insittende van ‘n motor wat Woensdagaand 23 Maart in die water weerskante van die R30 tussen Bothaville en Allanridge beland het, uit die water gehaal.
Nooddienswerkers is Woensdagaand 23 Maart net voor 21:00 na die toneel ontbied toe die voertuig met drie insittendes die pad verlaat en in die water beland het. Dit is die soveelste ongeluk op dié gedeelte van die pad nadat die pad vroeg in Februarie oorstroom het ná swaar reën. Konstruksiewerk is toe aan die pad gedoen om die geweldige skade wat die water aan die teervlak veroorsaak het, te herstel.
Sedertdien is minstens 11 mense al hier oorlede nadat daar bykans weekliks voertuie meestal saans hier in die water beland.
Sedert Gazette oor die ongelukke op die pad berig het, het verskeie lesers al kommentaar gelewer en meen die meeste dat die pad wel veilig is met duidelike spoed- en waarskuwingsborde, en dat die ongelukke volgens die kommentaar van lesers eerder te wyte kan wees aan spoed en die verontagsaming van die waarskuwingsborde. Ander weer beskryf die pad as ‘n doodspad wat eerder gesluit moet word. Maar vir baie motoriste en ook boere is hierdie ‘n noodsaaklike roete.