Ngwathe-burgemeester, rdl. Victoria de Beer, het onlangs inwoners se insette gevra vir die gedagte van ‘n “skoon dorp-kompetisie” vir Ngwathe. En elke week sien jy die span van die #MyParys-inisiatief in die dorp se hoofstraat en in Grewarlaan skoonmaak. Dié inisiatiewe vir ‘n skoon en netjiese dorp het reeds verskeie inwoners gemotiveer om hul eie sypaadjies netjies te hou, en mooi te maak. Nou kan jy boonop wen met jou deelname aan, “Die Mooiste Sypaadjie in Parys”-kompetisie, wat deur Petit Jardin geloods word.
Om in te skryf is maklik:
* Enige iemand kan deelneem.
* Inskrywings is oop vir die hele Parys, of jy in ‘n luukse woning bly, of in ‘n sinkplaat huis…hierdie gaan net oor die mooiste sypaadjie!
* Jy mag ook ‘n sypaadjie of munisipale area wat ‘n inwoner self mooi maak nomineer!
Al wat jy hoef te doen is om ‘n mooi, duidelike foto van jou sypaadjie/munisipale area wat jy self onderhou, te WhatsApp met jou naam, van, en straatadres na 083 258 3586.
Slegs foto’s met dié inligting sal aanvaar word. Inskrywings vir Maart 2022 sluit op 21 Maart. Die wenner sal elke maand op die laaste Vrydag van die maand aangekondig word, en die trofee-oorhandiging sal deur die burgemeester vir Ngwathe, saam met Sanette van Petit Jardin, oorhandig word op dieselfde dag wat die wenner aangekondig word, by die wenner se spog sypaadje.
Nie net ontvang jy ‘n wisseltrofee nie – daar sal elke maand ‘n fantastiese geskenk/geskenke saam met die trofee aan die wenner oorhandig word danksy ongelooflike borge se ondersteuning.
Wat kan jy wen?
🌟 Een nag se verblyf by River Rock Lodge
🌟 ‘n Wildrit deur Savannah Africa
🌟 Spa geskenkbewys van Stepping Stones Spa
🌟 ‘n Pragtige plant van Misty’s Garden Select
🌟 ‘n Geskenk van WITH HEART Creations
En, natuurlik die wisseltrofee wat deur die burgemeester vir Ngwathe aan jou oorhandig word. Borge wat wil bydra tot die kompetisie met pryse of geskenkbewyse kan vir Sanette by 083 258 3586 skakel.
Neem deel en maak ons weer trots op ons dorp! Dit kos jou niks, net die bereidwilligheid om deel te neem en ‘n verskil in jou dorp te maak. Die meegaande foto’s dien slegs as voorbeelde en is nie inskrywings nie.
Let wel:
Inskrywings wat in Maart ontvang is, sal outomaties oorgedra word na die volgende maand, sou jou sypaadjie-tuin nie die wenner wees.
Let asseblief ook daarop dat Petit Jardin net een van die beoordelaars en fasiliteerders van die kompetisie is en nie enige geldelike gewin uit die kompetisie kry nie.
Please note that Petit Jardin does not receive any income or any other form of advantage with this competition. Petit Jardin is the main facilitator of the competition as well as one of the judges.
