In ‘n angsnag wat kwalik in woorde beskryf kan word, het vloedwater Vrydagnag 4 Februarie, die lewe ge-eis van Chris Gillomee (59), terreinbestuurder van die Voortrekkers se Doornkloof-kampterrein. Swaar reën van by die 140mm het Vrydagnag in die distrik geval, en het die Doornkloof-spruit sy walle oorstroom.
In die angsure wat daarop sou volg moes onder andere 30+ koorlede en onderwysers van Witteberg wat op Doornkloof gekamp het, inderhaas na veiligheid gebring word. Hul bagasie is weggespoel maar was hul almal ongedeerd. Chris wat gehelp het om van die kinders na veiligheid te bring, is egter deur die vloedwater meegesleur en is sy liggaam vanoggend gevind.
Boere in die omgewing het gehelp om die kinders na Lindley terug te bring vanwaar ‘n bussie hulle na Bethlehem geneem het.
Die Vrystaatse Voortrekkers het in ‘n hartroerende boodskap gevra vir voorbidding vir Chris se vrou, Jackie, sy kinders, kleinkinders en familie. Chris sal onthou word vir sy liefde vir die kinders, hande wat vir niks verkeerd gestaan het nie, sy ongelooflike harde werk, sy poetse wat hy so graag gebak het en sy aansteeklike lag. Die Voortrekkers eer sy nagedagtenis en sal sy plek op Doornkloof verseker leeg wees vir elke Voortrekker wat hier gekamp het. “Ons harte is stukkend.”
